التحصيلي
بسم الله الرحمن الرحيم نبدأ
التحصيلي هو اختبار من اختبارات قياس استعدادًا لدخول الجامعة بعض الجامعات تاخذ منه ٣٠٪ البعض ٤٠٪ والاغلب ٤٠٪
للعلمي (اولاد وبنات) والادبي (بنات فقط) * نظام المسارات الله اعلم*
يكون مكون من ٥ اقسام لكل قسم ٢٥ دقيقه والمواد رياضيات كيمياء فيزياء والاسئلة ١١٠ سؤال ( كل المواد يجي منها)
ماشاءالله تبارك الرحمن ارتفعت ١٥ درجة عن السنة الي فاتت والحمدلله درجة على قد التعب والسعي احد الاسباب اني كنت ساده اذني عن كلام الناس من ناحية اشاعات التصحيح المعياري وان الاختبار تعجيزي وحظ ومن هذا الكلام المنتشر بكل مكان وللأسف كثير يتأثرون منه ويصدقونه الكلام هذا خطأ ١٠٠٪
اختبار التحصيلي اختبار جدًا عادي لاهو تعجيزي وغيره بس يحتاج منكم سعي وتدريب ومراجعه والحياة سهالات ولافي ظلم ولا مؤامرة ولا قياس حاقدين عليكم عدد المختبرين بالملايين ماراح يدققون على واحد شيلو هذي الافكار من راسكم امسكو كتبتكم وذاكرو واسعو هذا مستقبلكم وابتعدو عن اصحابكم واي احد تجلسون معه مو مهتم ومايبي يذاكر لان مره راح يأثر فيكم وتصيرون مثله لاسمح الله مانبدأ بعشوائية لازم نسوي لنا جدول وخطة والخطة تكون عبارة عن كل مادة من وين بتذاكرونها وبتشوفون شرح مين وكم يوم بتعطونها ولازم تكون على حسب قدراتكم انتو يعني ماتقولون بذاكر ٥٠ صفحة يوميًا وانتم مثلًا عارفين انكم ماراح تقدرون الا على ٢٠ حطو لكم شي واقعي يتناسب معكم ولاتضغطون على انفسكم وتبدون قبل الاختبار ب١٠ شهور الاختبار حده ٤ شهور او ٥ اذا مره قفلت معكم يعني اما اكثر من كذا اجهاد وتضيع وقت والدرجة مب على المدة على مذاكرتكم اساسًا
مصادرنا ✨🩵
١/ رياضيات 📕 عن نفسي شفت كتاب ناصر عبد الكريم وماناسبني ابد لاطريقة شرح ولا الي يشرحونه وترتيب الكتاب بعد ماناسبني ف رحت ذاكرته من المعاصر طبعًا سمعت كلام ان مايجي منه وان اسهل من مستوى الاختبار ومدري ايش قطيت الكلام ذا كله ورا ظهري ومشيت معه وراجعت معه ومستواي بالرياضيات كان ممتاز الحمدلله
ماشتركت بدورته بس شفت كتابه مع باركود الشرح ( راجعته مرتين)
٢/فيزياء📗 الفيزياء ذاكرته من ناصر عبد الكريم وماشفت له شرح الا نادرًا علشان مستواي كان حلو فيه وكنت اشرحه لنفسي ماعانيت معه ولاحسيت بصعوبة مثل مايقول البعض حسيته عادي مقدور عليه ( راجعته مرتين)
٣/ الكيمياء 📘مستواي فيه كان ماش شفته مع استاذ محمد العمري مره انصحكم فيه بس حطو المقطع 2 اكس ( سرعه يعني ) يأسسكم من الصفر تقريبًا مره اعجبني وكان معي دفتر واكتب معه تحسن مستواي من سيئ لممتاز الله يعطيه العافيه ويكتب اجره وكان يشرح من كتاب ناصر عبد الكريم (راجعته مرتين )
٤/ الاحياء📔 كتاب ناصر مو مره بالاحياء ف البعض شاف ملخص يلو والبعض شاف النبلاء عن نفسي ذاكرت من كتاب النبلاء تلقونه بجرير الكتاب حلو اقيمه ٩٠٪ ينقصه فقط الشرح يعني الكتاب مافيه شرح ولازم تشتركون بالدورة وهذا الشي الي ماحبيته عانيت معه بالبداية بعدين تعودت عليه وكان نهاية كل درس تجميعاته ونهاية الكتاب تجميعات ويجي معه ملحق الكتروني كان وافي وشامل بس ينقصه الشرح مثل ماقلت لكم خصوصًا دروس الوراثه وذا تحتاج شرح (راجعته ٣ او ٤ مرات) علشاني احب الاحياء🥱
مدة مذاكرتي كانت ٥ شهور واحس لو كانت اقل كان بيمشي الحال بعد بالنسبة للتجميعات ماشتت نفسي ابد تصفحت اغلبهم وحسيت افضل شي تجميعات استاذ غشام راجعت تبع ٢٢ وذاكرت ٢٣ واختباري الاول كان كله منها تقريبًا ٩٩٪ من الاختبار من تجميعاته مره انصحكم فيه وحتى اخطاءه قليلة بالنسبة لباقي
اخيرًا المذاكره مو اننا نفتح الكتاب ونقرأ ولا اننا ننسخ الكلام الي بالكتاب ونكتبه بالدفتر ❌ المذاكره تذاكرون الجزئيه يعني تفهمونها او تحفظونها على حسب ولما يجيكم سؤال عليها تعرفون كيف تحلونه هذي مذاكره صح وبتجيكم ايام مالكم خلق وملانين تذاكرون وايام تكونون مرهقين وتعبانين خصوصًا لو طلاب وعندكم
مدرسه وعلشان كذا ابدو بدري بحيث يمديكم تاخذون بريكات لو اضطريتو وماتأثر على خطتكم مره + سوو لكم جدول التزام يومي ان كل يوم تذاكرون جزيئة معينه المذاكره المتقطعه يوم اي ويوم لا أو يوم اي وعشر ايام لا مره غلط تسبب لكم عثرات ويصير عندكم نسيان مستمر وبيصير كأنكم ماسويتو شي
للي ماقفل على القدرات لاتضيع السنة على القدرات وتهمل التحصيلي بكذا تكون ماسويت شي ابدًا
" الكتب كلها من جرير"
تذكرو ان كثير جابو ٩٩ و١٠٠ وحولهم والاختبار اسهل من المذاكره مره حلو وسهل ابد لاتشيلون هم اسعو واتركو النتيجة على الله وصدقوني كلكم بتجيبون الدرجة الي تتمنونها وبتدخلون التخصص والجامعه الي تبونهم لكن اسعو ثم اسعو ثم اسعو مستقبلكم مستقبلكم مستقبلكم يارب وصلت بالتوفيق🩵
Comments
Post a Comment